Langka laho tu Pangadation


1.  MARHORI-HORI DINGDING
     Dison secara intern dihatai kedua belah pihak ma (perwakilan) na porlu tarsingot tu 
     maksud dohot tujuan ni paranak laho tu parhusipon. (Note; dang melibatkan pihak 
     hula-hula manang pamoruon nasida) 


2.  MARHUSIP
     Paranak dohot pamoruonna ro tu jabuni parboru laho marhata sinamot. 
     Sekalian persetujuan tu pangadation.
     Catatan ; 
     - Molo adong pesesuaian, lanjut tu na Martumpol. 
     - Molo dang adong persesuaian berarti Batal. 
     - Molo batal di adati, sebahagian adong na kawin lari (Mangalua) 
       Alai di ari nanaeng ro boido muse di adati, sahat tu na adong persesuaian kedua 
       belah pihak).


     Hal.Batal, boido alani massam ni situasi; 
     - Boido ala salah satu pihak manang kedua belah pihak margabus. 
       Misalna. Didok si baoa ibana doli-doli dopena, hape adong namamboto bahwa 
       ibana nungnga hea mangoli. Suang songoni nang borua, didok dang hea muli, 
       hape nungnga hea margelleng.
    -  Boi do tong alani tuhor naso adong persesuaian. Husus mengenai on apala 
       jarang do terjadi.  


3.  Martumpol (Tonggo Raja / Ria Raja)
     - Molo di Bona Pasogit manang di Medan; Lengkapma dison ro Dalihan Na Tolu 
        (DNT) ima Hula-hula+dongan tubu+Pamoruonna. 
        Jala tuntas do dison dihatai sinamotna.
     - Molo di Jakarta manang sebahagian di Pangarattoan; Boido holan paranak 
       dohot pamoruonna ro disi, laho mangkatahon sinamot.


4.  Pamasu-masuon torus tu Pesta Adat.
     - Molo di Bona Pasogit manang di Medan; Dung sae pamasu-masuon, 
       langsung do tu gedong.
     - Molo di Jakarta manang sebahagian di Pangarattoan; Olo do muse dihatai 
       sinamot, manang na hurang na di Pesta i. 


PANGALAHO DOHOT PARTORDING NI PANUNGKUNAN DI ULAON LAS NI ROHA

I. Marunjuk (Pangoli Anak - Pamuli Boru)

Prinsipna:

Halak na ro do sisungkunon,

halak nanidapothon do namanungkun.

Molo pangkataion i taringot hubungan ni antara Paranak dohot Parboru, ingkon Parboru do parjolo na manungkun (alana Paranak na rodo tu jabuni parboru). Pihak Paranak nungnga lengkap, jala nungnga sahat di jabu ni Parboru. Suang songoni nang Parboru nungnga lengkap paimahon dijabuni nasida, songoni nang angka naginokkon, jongjong ma parhata ni Parboru (PB), didokma songon on:

Manungkun ma Raja Parhata ni Parboru (Simanjuntak) - (PB);

"Di hamu Raja Pasaribu (misalnya), ala dison nunga rade hami Marga Simanjuntak (misalnya), na manungkun ma hami di haroro muna on;

Mangalusi ma Raja Parhata ni Paranak (Pasaribu) - (PA):

"Olo tutu Rajanami, jumolo ma tadok mauliate tu Amanta Debata Pardenggan Basai, ala asi ni roha-Na boi hami sahat tu jabu muna on di bagasan hahipason, nang hamu pe hudapothon hami tong do di bagasan hahipason. Mandok mauliate do hami nang tu hamu Raja­nami, ala dijangkon hamu do hami dohot denggan, mansai las do rohanami di ombas on. Anggo di rohanami nian Rajanami, molo boi pangidoannami ;

Jolo ninang-nang do, asa ninung-nung,

Jolo pinangan do,  asa sinungkun.

Ba, jolo mardaon pogu ma hita Rajanami."

PB: "Nauli. Ba, parade hamu ma."

( Note; Sabotulna nian boru ni Paranak do mangkobasi, alai ala huta ni Parboru do on, umbotoan do Parboru dikeadaan ni jabuna, jadi rap mangkobasi ma boru ni Paranak dohot boru ni Parboru di sipanganon dohot tudu-tudu ni sipanganon. Alai nuaeng tarlumobi di Pangarantoan sude sipanganon dohot tudu-tudu ni sipanganon nunga disediahon par-catering).

PA: "Di hamu borunami, parade hamu ma."

Dihandit boru ni Paranak ma tudu-tudu ni sipanganon, huhut didongani “Raja Parhata ni Paranak”, jala didok ma: Tudia ma peakkonon-nami." .

Adong dua versi:

1.     Dijolo ditonga-tonga ni loloan, manang

2.     Dijolo ni Suhut Bolon Parboru.

Dung sahat dijolo ni Suhut Parboru, dipadompakkonma tudu- tudu di sipanganon i, laos didok ma:

"Hamu Raja Simanjuntak, dison rodo hami mamatampak pasahathon tudu-tudu ni sipanganon patuduhon las ni rohanami laho pasangaphon hamu. Malambok pusu ma hamu Rajanami, tung so sadia pe on, las ma rohamuna manjalo.'

(pihak Paranak maniop pinggir ni pinggan nabolon inganan ni tudu-tudu ni sipanganon i)

PB:"Mauliate." (Marsijalangan)

"Borunami, boan hamu tuson dekke."

Dung dipapeak, didok ma:

"Dison ro do hami mamboan;

Dekke sitio-tio, sai tio ma antong parnidaan, dekke simudur-udur, sai mudur-udur ma antong pangga-bean, parhorasan di hita on sude, tumpahan ni Amanta Debata. Las ma rohamuna manjalo."

(Unangbe ditambai hata namandok: Tung so sadia pe on ias ma rohamuna manjalo).

P A: "Ise ma hita martangiang"

PB: "Ala hamu do mamboan sipanganon, sian hamu ma mambahen tangiang."

Dung sidung martangiang ihut ma didok:

"Sititip ma sigompa, golang-golang pangarahutna.

Otik pe natupa, sai godang ma pinasuna".

PA + PB: "Ima tutu".

PA: "Marjomuk ma hita".

Catatan: dung sidung na mangan, dihatai ma jolo taringot tu parjambaran

  "Jolo diseat hata asa diseat raut"

PB: Boha ma pangalaho ni tudu-tudu ni si panganon on

PA: Anggo taringot tu tudu-tudu ni sipanganon rajanami, nunga adong be aka inganan na hombar tu adat ta. Molo dos do rohata rajanami, ba songon on ma nian partordingna (pambagian jambar nunga dihatai hian di tingki ulaon marhusip, manang marhata sinamot)

Dung sae mambagi parjambaran, masisungkunan ma jolo angka na mardongan tubu, Paranak na marhaha-maranggi partubu. Songon pangaradeon laho mangadopi manang mangalusi pihak Parboru (intern masing-masing). Songon i nang di pihak Parboru masisungkunan nasida laho mangadopi manang mangalusi pihak Paranak (intern masing-masing).

Tujuan ni na masisungkunan (pangkataion) ima naeng manontuhon ise na gabe Raja Parhata (Parsinabung) sian masing-masing pihak, pihak Paranak dan pihak Parboru.

PB: "Hamu dongan tubu, dihita na marhaha-maranggi sude pomporan ni Raja Simanjuntak, ala ulaon on,  dihami pomparan Raja Hutabulu, songon naung tahasomalhon na saleleng on: molo hahana marulaon, anggina ma tutu nagabe Parsinabung; molo anggina marulaon, hahanaa ma tutu na gabe Raja Parsinabung.

Ala sisada urdot hita sisada tortoran, sisada hata do hita sisada oloan, jadi hamu ma na (haha nami) na gabe Raja Parsinabung mangalusi hata ni Raja Pasaribu. Dos ma rohamuna" (sebetulna nunga adong hian konsensus/dos ni roha manang ise na gabe Parsinabung).

(Note; Songoni do tong pangkataion manontuhon ise na gabe Parsinabung sian Pihak Paranak).

Raja Parsinabung Parboru (RPB - Raja Mardaup), mangandehon parjolo tu hula-hula suhut Parboru laho mangido panuturion, didokma:

"Di hamu hula-hulanami, tulangnami, tulang rorobot, bona tulang, bonani ari, hula-hula na marhaha-maranggi, hula-hulani anak manjae. Ala sahat ma hita tu na marhata, hupangido hami do sian hamu paniroion, rajanami. Asa tiroi hamu hami na laho mangadopi Raja Pasaribu"

Jongjong ma sahalak mewakili hula-hula, tulang, dohot sude na ginoaran di ginjang. Didok ma ;

"Mauliate ma dipasahat rohanta tu Amanta Debata ala hipas do hita sude ro tu ulaon on. Tong do dohononnami, ala dipasangap hamu do hami, molo dung dos rohamuna, songon nidok ni situa-tua ma tutu dohonon nami:

Aek na tio do hami, Riong-riong di pinggan pasu.

Hula-hula na basa do hami, Na ringgas mamasu-masu.

Ba, uduti hamu ma."

(Note; Songoni do nang pihak Paranak mangido paniroion sian hula-hulana).

II. Mulai ma marhata masisungkunan

PA (Raja Parhata Paranak): "Nunga rade be hami rajanami."

PB (Raja Parhata Parboru):

"Sise mula ni hata, sungkun mulani uhum,

Artia mula ni ari, sipaha sada mula ni bulan

Tangga dobalatuk, laba-laba parpintuan

Di na laho mangkatai ma raja ni hula-hula dohot raja ni boru".

"Pasahat hamu ma pinggan panungkunan i".

PA: "Borunami, pasahat hamu ma pinggan panungkunan

Isi ni pinggan panungkunan i, ima:

1.     Boras si pir ni tondi

2.     Napuran simauliate

3.     Ringgit si tio soara 4 lembar)

III. Dung dipasahat pinggan panungkunan:

PB: Dison dipasat hamu pinggan panungkunan, manumpak ma Amanta Debata, mamasu-masu ma Tuhan di ari nauli nadenggan on.

Dison boras si pir ni tondi, Pir pokki, bahul-bahul pansalongan. Pir ma tondinta, tu tambana pansamotan.

Dison napuran simauliate sipasahaton to raja.

Songon mamungka angka pangkataion nahombar tu paradaton na pinungka ni ompunta sijolo-jolo tubu.

Dison ringgit sitio soara, sipasonang dohot sipalas roha ni angka raja, di na mamungka angka pangkataion.  Asa songon nidok ni natua-tua ma tutu dohonon nami ;

"Pinattikkon hujur di topi ni tapian,

Ba, tudia pe hamu mangalangka, disi ma dapot parsaulian. "

Dungi diuduti Raja Parhata Parboru;

"Nunga bosur hita na mangan, sagat na marloppan juhut, 

Disi do lagina, disi do lagona.  Disi do daina, disi do tabona.

Pamurnas ma i tu daging, saudara tu bohi,

Sipatomak imbulu, sipaneang holi-holi.

Bagot na marhalto ma tubu di robean, horas do hami namanganhon,

tu ganda na ma dihamu na mangalehon.

Dia ma langkatna, dia ma unokna.

Dia ma hatana, dia na nidokna.

Botima. Boru nami, paulak hamu pinggan on tu Raja Pasaribu." Dilehon Raja Parhata ma hepeng i salembar tu siamunna, salembar tu hambirangna. Diparis ma i tu angka nahundul di jolo, dung ditukar tu hepeng na ummet-met. Salembar ma di Raja Parhata. Dung dipaulak pinggan panungkunan, disi tinggal dope salembar nari hepeng i. Dibuat Raja Parhata ni Paranak ma hepeng i.

PA: "Ima tutu Rajanami, jumolo ma tadok mauliate tu Amanta Debata, aia asi ni roha-Na do umbahen boi hita marpungu di ombas on di bagasan las ni roha. Mauliate muse dohononnami tu hamu, siala ria ni rohamuna.

Si titip ma si gompa, Golang-golang pangarahutna.

Otik pe Rajanami natupai, Ba godang ma pinasuna.

Ndang tois Rajanami, namangkolit do. Ba, molo tung mangkolit pe hami, lam tu tambana ma na hinolit asa boi bahenon nami sipalas rohamuna naumbalga sian on di tingki na naeng ro.

Sittuhu ni sipanganon manang lapatan ni sipanganon, panggabean parhorasan do Rajanami."

(Ingat: Pihak Paranak selalu merendah)

PB: "Ima tutu, sai saut ma hita gabe jala horas, tumpahon ni Amanta Na Martua Debata. Alai marangkup do nauli, mardongan do na denggan. Sihombar songon na hundul, siudur songon na mardalan. Sihombama, siuduma. Dia ma sitaringotan ba dipatangkas Raj a ni Paranak ma."

PA: "Olo tutu Rajanami;

marangkup do nauli, mardongan do na denggan.

 Asa tangkas ma purba, tangkas ma antong angkola.

Tangkas ma hita maduma, jala tangkas mamora.

Siudurna, sihombarna paboaon tu Rajai, alai jumolo ma hami marsantabi, asa molo adong hatanami na hurang lobi, anju hamu ma hami, tiroi hamu hami, jala ajari hamu.

Gala-gala si telluk, telluk mardagul-dagul

Molo adong na hurang lobi, nanget ma di apui-apul

Di ari na uli na denggan, ro do alu-alu ni anaknami Si (nama pengantin laki-laki) na mandok: nungnga dijakkon borumuna ibana.

Pitu lilina, paualu jogianna.

Nunga uli nipina, nunga tulus hatana.

Sada tamba sada, gabe sada dohot boru ni Raja i. Songgot do rohanami mambege alu-aluna, songgot nauli ma i, songgot na denggan. Sai songgot ma tutu las ni roha tu joloan on.

Tinapu bulung siarum, Bahen uram ni pora-pora.

Nahansit gabe malum, Molo dapot sinangkap ni roha.

Anggo alani pogosnami Rajanami, ndang tolap hami mandapothon hamu.

Barita ni lappedang, mardangka bulung bira.

Barita ni haburjuonmuna, sahat rodidia.

Marsomba ma hami dohot jari-jari sampulu pa sampulu sadahon simanjujung, tung jalo hamu ma ibana gabe ianakkonmuna. Langgo somba-somba ni uhum, somba-somba ni adat, olat ni na boi patupaon nami do; bahenon do Rajanami olat ni na tolap hami. Botima."

PB: "Raja ni Parboruonnami, las do rohanami mambege hatamuna i, songon nidok ni natua-tua:

Ndang tuktuhan batu, dakdahan simbora.

Ndang tuturan datu, ajaran na marroha.

Tangkas do binoto, jala tinanda do hamu. Pat ni gaja tu pat ni hora, anak ni Raja do hamu, jala pahompu ni namora. Onpe goari hamu, piga horbo, lombu, hoda, sadia godang mas, berlian, sadia godang Dollar Amerika. Rade ma hami manjalo. Botima."

PA: "Olo tutu Rajanami. Sigodang-godang pinajojor muna i, alai Rajanami ;

Duru ni harangan, hatubuan ni tada-tada.

Hansit do tangan mandanggurhon na soada.

langgo na nidokmuna ondeng, ba ndang parhorbo be hami Rajanami ndang parlombu, ndang parhoda. Ba, molo tung adong saotik ringgit dohot Dollar, nunga suda i pasingkolahon beremuna i. Manumpak ma tondimuna dohot sahalamuna, ndang ampehononmuna tu hami na so boi tuhukonami. Buhul hamu ma siboanonnami, pasada namu ma di rupiana, laos sitombol ma Rajanami. Pasahaton nami ma Rp 10.000.000,- (Sampulu juta rupia)."

(Catatan: Nunga dihatai hian jumlah on di tingki na namarhata Sinamot manang marhusip)

PB: "Onpe nuaeng di hita na mardongan tubu, songon i nang di borunami, tarlumobi ma di hula-hula nami dohot tutang. Nunga tabege hata ni parboruon (Pasaribu), hupangido hami ma paniroion sian hamu hula-hula nami. Alai parjolo ma hupasahat hami tu borunami:

Durung do tutu boru, Tomburan hula-hula

Naingkon do porsanon ni boru, Siporsanon ni hula-hula.

" Sada sian boru natua-tua jongjong:

Tu hita angka boru ni Raja Simanjuntak, nunga tabege sude angka pangkataion, tung mansai uli do sude tahe. Rap jongjong ma hita tuson asa tadok hatanta." (Laos jongjong ma nasida, boi do mewakili)

Dungi didok ma parjolo tu donganna boru:

"Antajau halubi, tu pining na mokkol tata.

Sahalak pe mandok nauli, sude ma hita nampunasa.

Sada silompa gadong, Dua silompa ubi.

Tung ahu na mandok, Sude ma hita dapotan uli.

" Laos diuduti mandok:

"Mauliateima tutu tadok tu Amanta Debata, ala asi ni roha, Na hipas do hita sude apala di tingki on. Mauliate muse hudok hami tu hamu hula-hula nami, ala dlpatuduhon hamu burju muna dohot holongni rohamuna marboru. Dipatuduhon hamu hula-hula nami do antong poda ni si jolo-jolo tubu: Elek Marboru, jala hami pe antong; Somba ma Marhula-huta. Huingot hami do umpasa ni natua-tua na mandok;

Na nidurung situma, Dapot pora-pora.

Molo burju marhula-hula, Napogos hian boi gabe mamora.

Onpe Rajanami, hami borumuna sipanolopi ma hami di angka nauli na denggan di hasadaon ni rohamuna. Botima."

PB: "Nunga tabege hata ni borunta, sipanolopi do nasida di angka nauli na denggan. Nuaeng pe hupasahat hami ma tu hula-hula nami dohot tu sude tahe horong ni hula-hula. Hupangido hami Rajanami paniroionmuna.

Hula-hula do bona ni ari, Tinongos ni Debate Mula Jadi.

Sisubuton do i marulak loni, Sioloan di rim ni tahi.

Hula-hula ni Parboru:

"Mauliate ma tapasahat tu Amanta Debata, ala asi dohot holong ni

roha-Na boi hita sude pungu di ombas on marlas ni roha pasahathon angka paradaton di hita halak Batak. Mauliate ma tutu dohonon nang tu hamu borunami, ala dipasangap hamu do hami. Songon nidok ni umpasa ma dohonon nami:

Balintang ma pagabe, Tumundalhon sitodoan

Ari muna ma gabe, Molo olo hamu marsipaolo-oloan"

(Tambahan: Andorang so dipasahat Paranak pinggan inganan ni sina-mot i tu jolo ni Parboru, dipangido Paranak do paniroion/pasu-pasu sian hula-hula ni Paranak dohot horongna. Sarupa do pangkataionna dohot hula-hula ni Parboru. Dipangido do tong paniroion sian tulang ni pengantin baoa (ala sidapot tintin marangkup do tulang on). Umpasa ni halak on boi do sarupa dohot umpasa ni hula-hula ni Parboru.

Contoh ni umpasa:

Obukdo jambulan, Na nidandan bahen samara.

Molo burju martulang, Pitu sundut soada mara.

Balintang ma pagabe, Tumundalhon sitodoan.

Ari muna ma sobe, Molo olo hamu marsipaolo-oloan.

PA: "Mauliate ma di hula-hula nami dohot horongna."

Dipangido Paranak do tong hata panolopion sian boru ni Paranak.

Bungkulan do boru, na mangumpi hula-hulana.

(Sarupa do hatana dohot hata ni boru ni Parboru)

Dung sidung sude taringot tu Sinamot (manang manggohi naung gok) jala nunga dialap hata sian kedua belah pihak, dohot sian hula-hula ni kedua belah pihak, songon i nang boru ni kedua belah pihak, dipasahat Paranak ma hepeng sinamot i di piring (pinggan). Dung diperiksa Raja Parhata ni Paranak jumlahna, dipasahat Paranak ma (Suhut Bolon) pinggan i tu Raja Parhata ni Parboru. Dung diperiksa Raja Parhata di Parboru ditorushon suhut bolon Paranak ma i tu suhut bolon ni Parboru (biasana ditortorhon ma i). Diusehon ma hepeng dohot boras na adong di piring i jala ditarei Parboru ma i di bagasan ulos.

Note;    Dos do rumang ni pangkataion di sude pesta taringot nama-sisungkunan, molo marunjuk

adong pinggan panungkunan, holan ido bedana.

Dung dipasahat sinamot i, mardalan ma muse Suhi Ni Ampang Na Opat (Todoan) dohot tintin marangkup, panandaion, batu ni sulang-sulang (tuhor ni boru). Anggo tuhor ni boru i Parboru do pasahat i tu angka horongna. Molo tintin marangkup ima tu tulang ni pengantin laki-laki Rap do Parboru dohot Paranak pasahathon i, jumlahnya masing-masing;

1/2 (satonga), misalnya Rp 300.000,- (sian Parboru Rp 150.000, sian Paranak Rp. 150.000).

Suhi ni ampang na opat:

1.     Pamarai

2.     Si hutti ampang

3.     Hula-hula

4.     Simandokkon.

Dung sidung sude na mardomu tu sinamot sahat tu inganan be, sahat ma muse tu na pasahat ulos.

1.     Ulos Pansamot

2.     Ulos Hela + sarung (mandar)

3.     Ulos Pamarai

4.     Ulos tu sihutti ampang

5.     Ulos Simandokkon

6.     Ulos todoan

(Ditunjuk Paranak. Manang piga godangna, adong dua pendapat. Pendapat pertama: maksimal 17 ulos, pendapat kedua: tergantung tu torop ni Paranak na pantas mandapot ulos)

Dungi diuduti Parboru, hula-hula dohot tulang, dohot angka na asing ma pasahathon ulos tu pengantin.

Taringot tu pangaleanan ulos on asa diparate-atehon hasuhuton bolon, alana pangaleanan ulos (pangulosion) sada hal na sangat( peka atau sensitif). Boi do terjadi hal-hal na hurang denggan di roha, misalnya Paranak torop so piga angka namarhamaranggi sa ina, suang songoni nang ibotonan dohot boruna kandung naung marrumah tangga, jala sude nasida maringkot ingkon mendapat ulos sian pihak hula-hula (alana pengertian ni halak batak nasasintongna; ulos nasian hula-hula ima parhitean pasu-pasu nasian Debata mulajadinabolon).

Sumber; Humala Simanjuntak, SH (Dalihan NaTolu, Nilai-Nilai Budayayang Hidup)